యుటోపియా ఎంటర్ టైనర్స్, ఫిల్మోత్సవ్ సంస్థలు సంయుక్తంగా చంద్ర సిద్దార్థ దర్శకత్వంలో నిర్మించిన ‘అందరి బంధువయా’ పాటలు ‘మధుర’ ఆడియో ద్వారా విడుదలయ్యాయి. పాటల క్యాసెట్లను శ్రీనువైట్ల విడుదలచేసి, తేజకు అందించారు. సీడిలను అల్లు అరవింద్ విడుదలచేసి డి.రామానాయుడుకు అందించారు. ఈ సందర్భంగా రామానాయుడు మాట్లాడుతూ- ‘స్వంత విధానం ఉన్న చక్కటి దర్శకుడు చంద్ర సిద్దార్థ’ అని ప్రశంసించారు. అల్లు అరవింద్ మాట్లాడుతూ- ‘చంద్ర సిద్దార్థ కమిటెడ్ దర్శకుడు. చిన్న దర్శకుల్లో పెద్ద దర్శకుడు. చిత్ర పరిశ్రమ మనుగడకు చిన్న చిత్రాలే ప్రధానం. మంచి చిత్రాలను ప్రేక్షకులు ఆదరించాలని’ అన్నారు. రాష్ట్రమంత్రి శ్రీధర్ బాబు మాట్లాడుతూ- ‘తొలి చిత్రమే ఇంగ్లీషులో ‘ఇన్ స్ర్కూటబుల్ అమెరికన్స్’ పేరిట తీసిన నా మిత్రుడు చందు ‘ఆ నలుగురు’తో మంచి దర్శకుడిగా పేరు పొందారు. ఈ చిత్రం అతనికి మరింత మంచి పేరు తేవాలని’ అన్నారు. నరేష్ మాట్లాడుతూ- ‘ఇద్దరు ముగ్గురు మధ్య జరిగే అందమైన చిత్రం ఇది. ఇందులో నాపాత్ర నా కెరీర్లోనే బెస్ట్ అవుతుందని’ అన్నారు. తమ్మారెడ్డి భరద్వాజ మాట్లాడుతూ- ‘తను నమ్మినదాన్ని, అనుకున్నదాన్ని అందంగా తీసే దర్శకుడు చంద్ర సిద్దార్థ’ అని అన్నారు.
చంద్ర సిద్దార్థ మాట్లాడుతూ- ‘రమణిగారు చెప్పిన కథ వినగానే మంచి మనసున్న సినిమా చెయ్యొచ్చని అనుకున్నాను.అనూప్ మంచి పాటలు ఇచ్చాడు. చిన్ననాటి మిత్రుడు ఆర్కేతో, మంచి యూనిట్ తో ఈ చిత్రం సంతృప్తికరంగా చేశానని అన్నారు. ఈ కార్యక్రమంలో కథానాయిక పద్మప్రియ, రాజా, ఆర్పీ పట్నాయక్, చైతన్యప్రసాద్, ఆర్కే, అనూప్, లగడపాటి శ్రీధర్, మధురా శ్రీధర్ రెడ్డి, జయకృష్ణ గుమ్మడి, దేవ్ కట్టా, కూచిపూడి వెంకట్, మాగంటి గోపీనాథ్, బలభద్రపాత్రుని రమణి పాల్గొన్నారు. సునయన, రఘు వ్యాఖ్యాతలుగా వ్యవహరించారు.
