మూడు దశాబ్దాలకు పైగా శతాధిక కార్యక్రమాలను నిర్వహిస్తూ వస్తోన్న వై.కే అలుపెరుగని సాంస్కృతిక బంధువు...శేముషీ సింధువు..అందరితో సత్సంబంధాలున్న ఆకర్షక బిందువు.

ఒకపక్క నాటక రంగంలో చక్కటి పౌరాణిక పాత్రల్ని ధరిస్తూ ప్రేక్షకుల ప్రశంసలు అందుకుంటూ, మరోపక్క పెద్దయెత్తున సాంస్కృతిక కార్యక్రమాల్ని నిర్వహిస్తుంటారు వై.కే. అయితే ఎంతటి మెగా ఈవెంటైనా ఆయన ముఖంలో చిరునవ్వు ఏమాత్రం చెదరదు. ఎంత హడావుడి, హైరానా ఉన్నా

పరమ ప్రశాంతంగా ఉంటూ అత్యంత సహనంతో, సంయమనంతో పనులన్నిటిని పర్యవేక్షిస్తుంటారు. గౌతమబుద్ధ, వివేకానంద పాత్రలు పోషించటంలో ఆరితేరిన వై.కే ఆ పాత్రలు నేర్పిన విలువలని తన దైనందిన జీవితంలోనూ ఆచరణలోకి తెచ్చేందుకు కృషి చేస్తుంటాడు. నటుడిగా అత్యంత ప్రతిష్ఠాత్మక పురస్కారాలను అందుకున్న వై.కే విజయవంతమైన జీవితం వెనుక పుట్టెడు విషాదం దాగి ఉందన్న సంగతి బాహ్య ప్రపంచానికి తెలియదు. ఓపిక ఉన్ననాళ్ళు జీవితం గడవడానికి ఉద్యోగం పేరుతో ఊడిగం చేయకతప్పలేదు. అయినా అవకాశం చిక్కినపుడెల్లా తనకు ఎంతో ఇష్టమైన కళారంగానికి మళ్ళి మనసా సేవ చేస్తుండేవారు. రిటైర్మెంట్‌ తరువాత పూర్తిస్థాయిలో కళారంగానికి అంకితమై పనిచేయాలనుకుంటున్న సమయంలో చేతికి అందివచ్చిన చెట్టంత కొడుకును విధి పొట్టన పెట్టుకుంది. ఆ దుర్వార్తకు కృంగిపోయిన వై.కే మెల్లమెల్లగా తేరుకొని తాను చేయవల్సిన కర్తవ్యం ఇంకా ఉందని గుర్తించి తిరిగి యువకళావాహినికి పూర్వ వైభవాన్ని తీసుకువచ్చారు. తన కొడుకు పేరుమీద గురుప్రసాద్‌ ఎక్సలెన్స్‌ అవార్డును స్థాపించి విద్యారంగంలో ప్రతిభ కనబరిచే విద్యార్థులకు, వర్ధమాన కళాకారులకు ప్రతియేట బహూకరిస్తున్నారు. వర్ధమాన కళాకారులకు ఎనలేని ప్రోత్సాహాన్ని అందించే వై.కే వివిధ సంప్రదాయ కళలకు చెందిన కళాకారులకు తమ ప్రతిభను ప్రదర్శించే గొప్ప అవకాశాలను అందిస్తుంటారు. ఎన్ని కష్టాలు ఎదురైన, ఎన్ని అవాంతరాలు తారసపడినా వాటన్నిటినీ తట్టుకొని నిలబడే దృఢమనస్వి, రమ్యయశస్వి మన వై.కే.

గురుప్రసాద్‌ మీడియా డైరెక్టరీ
ఖండాంతర ప్రాచుర్యాన్ని సాధించిన యువ కళావాహిని సంస్థ ప్రతియేట వెలువరించే గురు ప్రసాద్‌ మీడియా డైరెక్టరీ అంతర్జాతీయ స్థాయిలో గుర్తింపు తెచ్చుకొంది. దేశ విదేశాల్లో స్థిరపడిన ప్రముఖుల వివరాలతో పాటు అనేక రంగాలకు చెందిన కళాకారుల అడ్రెస్సులు, ఫోన్‌ నెంబర్లు ఈ డైరీలో ఉంటాయి.

సమున్నత ఆశయంతో అలుపనేదే లేకుండా అహర్నిశలు శ్రమిస్తూ 60వ వసంతంలోకి అడుగు పెట్టిన వై.కే నాగేశ్వరరావు తన సేవలతో కళారంగంలో మరిన్ని వసంతాలను విరబూయించాలని, తెలుగు వారు గర్వించేలా మరిన్ని భారీ కార్యక్రమాల్ని నిర్వహించాలనీ మనసా కోరుకుందాం. ఆ కళామతల్లి ఆశీస్సులతో నిండు నూరేళ్ళూ చల్లగా ఉండాలని ఆశిద్దాం.