'ప్రేమిస్తే'వంటి హృదయాన్ని హత్తుకునే ప్రేమకథా చిత్రాన్ని అందించిన సురేష్ కొండేటి తాజాగా తమిళంలో
ఘనవిజయం సాధించిన 'అంగాడి తెరు' తెలుగు అనువాద హక్కులు పొందారు. సంతోషం స్టూడియోస్ ప్రైవేట్
లిమిటెడ్ సమర్పణలో ఎస్.కె.పిక్చర్స్ ద్వారా 'షాపింగ్ మాల్' పేరిట ఈ చిత్రాన్ని విడుదల చేస్తున్నారు.
వసంతబాలన్ దర్శకత్వంలో అంతా కొత్తవారితో రూపొందిన ఈ చిత్రం 15 కోట్ల రూపాయలకు పైగా వసూలు చేసి రికార్డ్
సృష్టించింది.
ఈ చిత్రవిశేషాలను నిర్మాత సురేష్ కొండేటి చెబుతూ - "ప్రేమిస్తే సినిమా తర్వాత మళ్లీ అలాంటి సినిమా చేయాలనే
ఆకాంక్షతో దాదాపు ఐదు సంవత్సరాలుగా మంచి సినిమా కోసం ఎదురు చూశాను. ఈ నేపథ్యంలో తమిళ 'అంగాడి
తెరు'ని చూశాను. ప్రేమిస్తేకన్నా మంచి సినిమా అవుతుందనిపించింది. ఈ సినిమా అనువాద హక్కులకు
ఎంతోమంది పోటీపడ్డారు.
అయితే మా సంస్థ మీద ఉన్న నమ్మకంతో అయ్యంగరన్ ఇంటర్నేషనల్ ఫిలింస్ అనువాద హక్కులను మాకే ఇచ్చింది.
యదార్థ సంఘటనలను ఆధారం చేసుకుని రూపొందిన చిత్రం ఇది. త్వరలో ఈ చిత్రాన్ని విడుదల
చేయాలనుకుంటున్నాం' అన్నారు. మగేష్, అంజలి జంటగా నటించిన ఈ చిత్రానికి సంగీతం: విజయ్
ఆంథోని, జీవీ ప్రకాష్కుమార్, మాటలు: శశాంక్ వెన్నెలకంటి, సహనిర్మాత: ఊటుకూరి నాగార్జున్.
