భూమి మీద కాదు.. ఏకంగా గగన విహారం చేస్తూ పుట్టినరోజు వేడుక జరిపి, ప్రియురాలిని ఆశ్చర్యంలో ముంచెత్తాడు రణబీర్. అసలు విషయంలోకి వస్తే.. ‘రాక్‌స్టార్’ ప్రమోషన్ కోసం ఇటీవల ఈ యూనిట్ సభ్యులు నాగ్‌పూర్ వెళ్లారు. మొత్తం అందరూ ఒకే ఫ్లయిట్‌లో ప్రయాణం చేశారు. ఆరోజు నర్గిస్ బర్త్‌డే కావడంతో ఆమెకు తెలియకుండా విమానంలోనే ఓ పార్టీ ఏర్పాటు చేశాడట రణబీర్. ముంబయిలోని ఓ ప్రముఖ బేకరీలో కేక్ తయారు చేయించాడట రణబీర్.

విమానం ఇరవై వేల అడుగుల ఎత్తుకి వెళ్లిన తర్వాత నర్గిస్ అసిస్టెంట్ ఆమెను క్యాబిన్ నుంచి బయటికి తీసుకెళ్లిందట. ఐదు నిమిషాల తర్వాత క్యాబిన్‌కి తిరిగొచ్చిన నర్గిస్ అక్కడి అలంకరణ చూసి ఆశ్చర్యపోయిందట. ఆ ఆశ్చర్యం నుంచి తేరుకునే లోపు ‘హ్యాపీ బర్త్‌డే టు యూ’ అంటూ యూనిట్ సభ్యులు పాడటం ఆమెను మరింత థ్రిల్‌కి గురి చేసిందని సమాచారం. తను పుట్టిన తర్వాత ఇలాంటి బర్త్‌డే జరుపుకోలేదని, ఆకాశంలో బర్త్‌డే జరుపుకోవడం ఓ కొత్త అనుభవం అని ఆనంద భాష్పాల మధ్య నర్గిస్ కేక్ కట్ చేసిందట. 20 వేల అడుగుల ఎత్తులో బర్త్‌డే చేసిన రణబీర్ ప్రియురాలికి మనసులో ఏ రేంజ్ స్థానం ఇచ్చాడో ఊహించొచ్చును.