ప్రముఖ సినీ, రంగస్థల నటుడు, దర్శకుడు, రచయిత గిరీశ్ కర్నాడ్(81) కన్నుమూశారు. బెంగళూరులోని ఆయన స్వగృహంలో సోమవారం ఉదయం 6.30 గంటలకు ఆయన తుది శ్వాస విడిచారు. గిరీష్ కర్నాడ్ 19 మే 1938లో మహారాష్ట్రలోని మాథేరాన్ ప్రాంతంలో జన్మించారు. కన్నడలో పలు నాటకాలు రచించి ఆయన వెలుగులోకి వచ్చారు. 1970లో ‘సంస్కార’ అనే చిత్రం ద్వారా ఆయన సినిమాల్లో అరంగేట్రం చేశారు. ఆ తర్వాత కన్నడ, తెలుగు, హిందీ, తమిళం, మలయాళం సినిమాల్లో ఆయన నటించారు
జంధ్యాల దర్శకత్వంలో 1983లో తెరకెక్కిన ‘ఆనందభైరవి’ చిత్రంతో కర్నాడ్‌కు తెలుగులో మంచి గుర్తింపు వచ్చింది. శంకర్ దాదా-ఎంబీబీఎస్, కొమరం పులి, స్కెచ్ ఫర్ లవ్, ధర్మచక్రం తదితర తెలుగు సినిమాల్లో ఆయన నటించారు. అంతేకాకుండా.. బుల్లితెరపై సంచలన విజయం సాధించిన ‘మాల్గుడి డేస్’ అనే సీరియల్‌లోనూ ఆయన నటించారు. చివరిగా ‘అప్నా దేశ్’ అనే కన్నడ సినిమాలో ఆయన నటించారు. ఈ సినిమా ఈ ఏడాది ఆగస్టు 26న విడుదలకానుంది. మద్రాస్‌లో ఆక్స్‌ఫర్డ్ యూనివర్సిటీ ప్రెస్‌లో పని చేస్తున్న సమయంలో డా.సరస్వతి గణపతిని ఆయన ఓ పార్టీలో కలుసుకున్నారు. దాదాపు పది సంవత్సరాల తర్వాత వాళ్లు వివాహం చేసుకున్నారు. వీరికి ఇద్దరు సంతానం.
సాహిత్యంలోనూ మంచి పట్టు ఉన్న ఆయనకు 1998లో సాహిత్య అకాడమీ వాళ్లు జ్ఞానపీఠ్ అవార్డును ప్రధానం చేశారు. అంతేకాక.. సాహిత్య రంగంలో ఆయన అందించన సేవలకు భారత ప్రభుత్వం 1974లో పద్మశ్రీ, 1992లో పద్మ భూషణ్ అవార్డులు ఇచ్చింది. సినిమాలకు సంబంధించి ఆయన ఏడు ఫిలింఫేర్ అవార్డులు, 10 జాతీయ అవార్డులు అందుకున్నారు. గిరీశ్ కర్నాడ్ మృతిపై పలువురు సినీ, రాజకీయ ప్రముఖులు సంతాపం తెలియజేశారు.
ఉద్యోగాన్ని సైతం విడిచిపెట్టి…
ప్రముఖ నటుడు, రచయిత, బహుముఖ ప్రజ్ఞాశాలి గిరీష్ కర్నాడ్ ఈరోజు కన్నుమూశారు. బాల్యం నుంచే గిరీష్ కర్నాడ్ రచనా వ్యాసంగాన్ని ప్రారంభించారు. ఉన్నత విద్యాధికుడైన కర్నాడ్ ఉద్యోగాన్ని సైతం విడిచిపెట్టి కళలకే అంకితమయ్యారు. ఆయన ధార్వాడలోని కర్నాటక ఆర్ట్స్ కాలేజీలో గణితశాస్త్రంలో పట్టాపుచ్చుకున్నారు. తరువాత ఇంగ్లాండులోని ఆక్స్‌ఫర్డ్ యూనివర్శిటీలో ఫిలాసపీ, పాలిటిక్స్, ఎకనామిక్స్ అభ్యసించారు. 1963లో ఆక్స్‌ఫర్డ్ యూనియన్ ప్రెసిడెంట్‌గా ఎన్నికయ్యారు. ఆయన ఏడేళ్ల పాటు ఆక్స్‌ఫర్డ్‌లోనే ఉన్నారు. తరువాత అమెరికా చేరుకుని యూనివర్శిటీ ఆఫ్ చికాగోలో చదువుకున్నారు. అనంతరం భారత్ తిరిగి వచ్చి, చెన్నైలోని ఆక్స్‌ఫర్డ్ యూనివర్శిటీ ప్రెస్‌లో ఉద్యోగంలో చేరారు. అక్కడ తన రచనావ్యాసంగాన్ని కొనసాగించడంతోపాటు థియేటర్‌పై కూడా దృష్టి పెట్టారు. తరువాత ఉద్యోగాన్ని విడిచిపెట్టి సినిమాలవైపు మళ్లారు. ‘తుగ్లక్’, ‘అంజు మల్లిగె’, ‘అగ్నిమతు మాలె’, ‘నగా మండల్’ తదితర నాటకాలు గిరీష్ కర్నాడ్‌కు ఎంతో పేరుతెచ్చిపెట్టాయి. గిరీష్ కర్నాడ్ తెలుగులో ‘ధర్మచక్రం’, ‘శంకర్‌దాదా ఎంబీబీఎస్’, ‘కొమరంపులి’ తదితర చిత్రాల్లో నటించారు. ప్రస్తుతం ఆయన తెలుగులో ‘స్కెచ్ ఫర్ లవ్’ సినిమాలో నటిస్తున్నారు
