హాలీవుడ్ చిత్రం ‘ది కరాటే కిడ్’ కు సీక్వెల్ రూపొందబోతోంది. అయితే అది సినిమా మాత్రం కాదట. 1984లో ప్రపంచవ్యాప్తంగా విజయఢంకా మోగించిన ‘ది కరాటే కిడ్’ చిత్రం ఇప్పటికీ ప్రేక్షకుల ఆదరాభిమానాలు చూరగొంటూనే ఉంది. 2010లో ఈ చిత్రానికి రీమేక్ చేయగా అది కూడా ఘనవిజయం సాధించింది. ఒరిజినల్‌లో రాల్ఫ్ మాచికో, పాట్ మొరిటా లీడ్ రోల్స్ చేయగా రీమేక్‌లో జాకీ చాన్, జేడన్ స్మిత్ అలరించారు. తాజాగా ఈ చిత్రానికి సీక్వెల్ తెరకెక్కబోతోంది. అయితే సీక్వెల్ సినిమాగా కాకుండా వెబ్ సిరీస్ రూపంలో రూపొందబోతోందట.
‘ది కరాటే కిడ్’ సినిమా వచ్చి ఇప్పటికీ ముప్ఫై మూడు ఏళ్లు పూర్తవ్వగా తాజాగా ఈ చిత్రానికి సీక్వెల్ ను రూపొందించాలని అందులోని లీడ్ యాక్టర్లు కంకణం కట్టుకున్నారు. అయితే సినిమా కథ ముగిసిన తరువాత జరిగే టోర్నమెంట్లు, తదనంతర పరిణామాలపై ఈ సీక్వెల్ రూపొందబోతోందని తెలుస్తోంది. ఈ చిత్రానికి ‘కోబ్రా కాయ్’ అనే టైటిల్ ను ఖరారు చేశారు. 2018లో విడుదలవ్వనున్న ఈ వెబ్ సిరీస్‌లో మొత్తం 10 ఎపిసోడ్లు ఉండనున్నాయి. మరి ఈ సీక్వెల్ ప్రేక్షకులను ఏ రీతిన అలరిస్తుందో చూడాలి
