సాయి పల్లవి… ‘ఎప్పుడూ నీ బెస్ట్‌ ఇవ్వు. జీవితం ఏదో ఓ రూపంలో ఎప్పటికైనా ఆశీర్వదిస్తుంది’ అంటూ ప్రభుదేవాతో దిగిన ఫొటోను షేర్‌ చేశారు సాయి పల్లవి.‘‘జీవితంలో అనుకున్నవన్నీ అనుకున్నట్లుగా జరగకపోతే ఏం టెన్షన్‌ పడకండి. చేసిన పనిలో మన బెస్ట్‌ ఇచ్చామా? లేదా అన్నదే ముఖ్యం. ఏమో? ఎవరికి తెలుసు.. దొరకలేదనుకున్నది మరో రూపంలో సర్‌ప్రైజ్‌ గిఫ్ట్‌లా మనకే తారసపడొచ్చు’’ అని సాయి పల్లవి అంటున్నారు. దానికి ఆమె ప్రయాణమే ఎగ్జాంపుల్‌. అది 2008.. చెన్నైలోని ఏవీయమ్‌ స్టూడియోస్‌. ‘ఉంగళిల్‌ యార్‌ ఆడుత్త ప్రభుదేవా’ (మీలో ఎవరు తర్వాతి ప్రభుదేవా?) అనే డ్యాన్స్‌ షో సెమీ ఫైనల్స్‌ నడుస్తున్నాయి. సాయి పల్లవి టీమ్‌ కూడా ఆ ప్రోగ్రామ్‌లో పాల్గొంది. కానీ సెమీ ఫైనల్స్‌లోనే వెనక్కి తిరిగారునిరాశతో… సరిగ్గా పదేళ్ళ తర్వాత 2018… ఏవీయమ్‌ స్టూడియోస్‌. ధనుష్‌తో సాయి పల్లవి చేస్తున్న ‘మారీ 2’లోని ‘రౌడీ బేబీ.. ’ సాంగ్‌ షూట్‌. షూటింగ్‌ స్పాట్‌కు వెళ్తుంటే తెలిసిన ప్రదేశంలానే తోచింది సాయి పల్లవికి.
అవును.. సరిగ్గా పదేళ్ల క్రితం డ్యాన్స్‌ షో చేయడానికి ఆమె ఇక్కడికే వచ్చింది. ఆ షో గెలిచి ఉంటే ప్రభుదేవాతో ఓ మొమెంటో అందుకునేదేమో పల్లవి. కానీ ఏకంగా ప్రభుదేవా మాస్టరే ఇప్పుడు ఆమెకు మూమెంట్స్‌ కంపోజ్‌ చేయడం విశేషం. అక్కడ చేజారిందనుకున్న అవకాశాన్ని కాలం రెట్టించి తిరిగిచ్చేసింది. అప్పుడు ఫెయిలైన సాయి పల్లవి ఈసారి సక్సెస్‌ అయింది. ‘బాగా డ్యాన్స్‌ చేశావ్‌’ అంటూ ప్రభుదేవా నుంచి అభినందనలు కూడా అందుకుంది. ఈ ఆనందాన్నే తాజాగా పంచుకున్నారు సాయి పల్లవి. ‘ఎప్పుడూ నీ బెస్ట్‌ ఇవ్వు. జీవితం ఏదో ఓ రూపంలో ఎప్పటికైనా ఆశీర్వదిస్తుంది’ అంటూ ప్రభుదేవాతో దిగిన ఫొటోను షేర్‌ చేశారు సాయి పల్లవి.
టైమ్‌కి షూటింగ్‌ రాననడం కరెక్ట్‌ కాదు !
నేను బయట ఎక్కడైనా కనిపిస్తే సాయిపల్లవి అనడం లేదు.. భానుమతి అంటున్నారు. అంతలా ప్రేక్షకులు నన్ను ప్రేమిస్తున్నారు. ఇదొక బాధ్యతగా భావించి, ప్రాధాన్యం ఉన్న, వైవిధ్యమైన పాత్రలు ఎంచుకుంటున్నా. నేను ఎక్కువగా మాట్లాడలేను. ఇప్పుడిలా మాట్లాడుతున్నానంటే కారణం డైరెక్టర్‌ శేఖర్ కమ్ములగారు, భానుమతి పాత్రే కారణం. నేను టైమ్‌కి షూటింగ్‌ రాననడం కరెక్ట్‌ కాదు. టైమ్‌కి సెట్‌లో ఉంటా. హిట్టు, ఫ్లాపు అనేది పెద్దగా మైండ్‌కి ఎక్కించుకోను. మన ప్రయత్న లోపం ఉండకూడదనుకుంటా. ఆ తర్వాత దేవుడి, ప్రేక్షకుల ఆశీర్వాదాలు ఉండాలి. రిజల్ట్‌ ఏదైనా మన మంచికే అనుకుంటాను.
